Ein desemberdag på Bruviknipa

Utsikt frå Bruviknipa 13.desember
Utsikt frå Bruviknipa 13.desember Foto: Sigrid Kvåle Myksvoll

I år fekk Bruviknipa besøk på sjølvaste Luciadagen. For anledninga hadde ho kledd seg i ei fin kvit drakt av snø. Ho strålte i desembersola.

Snøen knitra under fjellskoa. Kaldt i ansiktet. Pakke seg inn i dunjakke på toppen. Ingen andre personar i sikte. Dagslys og sol ein kvardag i desember. Bonus.

Frå parkeringa ved Båtaleitet og opp til toppen tar det omlag 1,5 t. Turen er 2,3 km lang. Parkeringa ligg på 342 moh, så ein må gå omlag 470 høgdemeter før ein er oppe på toppen og kan skrive seg inn i besøksboka. På toppen blir ein belønna med fantastisk utsikt i alle retningar.



Det er ikkje sjølvsagt at det er gode forhold for fottur til Bruviknipa på Osterøy i desember. Stien opp er mykje brukt og merka med stokkar som står fast i bakken og gule merker i trea. Likevel må ein sjå litt ekstra godt etter dei på grunn av snøen. Snøen var overraskande fin å gå i heile vegen til topps. Det var klink is der kor bekkane vanlegvis renn, men det var lett å runde desse utan særlege omvegar. ​​​​​​​

Sjekk turforslaget på ut.no her.